سانتا مونيكا !

السلام عليكم

مرحبا يا زوار المدونه ..

شلونكم ؟

شخباركم ؟

الصراحه أقدم لكم اعتذاري ..

وآآسف على الانقطاع اللي صار بسبب الانشغال ..

منها الانشغال برمضان .. والسفر

الصراحه انا الحين متواجد في أحضان الولايات المتحده !

وبالتحديد .. منطقة سانتا مونيكا بـ لوس انجلس في ولاية كاليفورنيا

انا جاي هالمنطقه علشان دراسه وعسالله يسهل الامور

والمنطقه الحمدلله من احلى مناطق امريكا من ناحية الجو والاماكن السياحيه والشاطئ والسكان والمعيشه !

<< ولو انها منطقة ناس الـ هاي هاي .. بس كويسه p-:

وانا حبيت اني احط هالموضوع وابين فيه شوية شغلات ^_^

وبسم الله نبدي ..

والرحله خذت مني تقريباَ 23 ساعه !

5 ساعات وثلث من الكويت لي فرانكفورت

4 ساعات ونص ترانزيت !

13 ساعه من فرانكفورت لي لوس انجلس!

وهذا خط الرحله !

.
.
.

هذي صوره لبحر متجمد في القطب الشمالي !

.
.
.

هذي صوره للشاطئ .. اللي يميز المنطقه ..

والحلو بالصوره ان البنت تلعب مع وحده صغيره .. وجو رومانسي .. وطير بالسما .. والمحيط الهادي على اليسار .. والجبال والغيم جدام .. والمدينه يسار .. يعني خوش شي ^_^

.
.
.

هذي صوره .. يبين فيها مثل كشك .. يكون فيه منقذ .. وصندوق امانات على ما اعتقد !

.
.
.

من شواطئ المحيط الهادي !

.
.

من أحلى الصور اللي صورتها ^_^

.
.
.

هذي صوره للشاطئ بس بيوم ثاني

كنا طالعين بمكان اسمه Pier مثل مدينه ترفهيه صايره بالبحر !

.
.
.

هذا المنظر اللي كان وراي وانا بنفس مكان الصوره الاولى ..

شكل الغيم مع النخل عجييييييب

.
.
.

هذا المنظر اللي على يمين الصوره اللي قبلها ^_^

تلاحظون فيها شوية ألعاب ^_^

.
.
.

هذا اكثر شي يميز المنطقه ..

الي اهو الـ ثيرد ستريت ..

شارع يذكرني بشارع " لا رمبلا " اللي بـ برشلونه الاسبانيه ..

شارع كله محلات ماركات ومطاعم وسينمات .. وعروض تصير بالشارع مثل ناس يعزفون .. وناس يرقصون .. وناس يسون اشياء غريبه ..

يعني الشارع هذا فيه حركه حلوه ما تخلي الواحد يمل !

هذي صوره ثانيه له ..

.
.
.

هذا الـ ثيرد ستريت بالليل ..

.
.
.

هذي وحده من السينمات الموجوده بالشارع

.
.
.

هذي صوره كنت ناطر الباص !

.
.
.

هذي الصوره من على جسر المشاة .. اللي يفصل المنطقه والشاطئ

.
.

هذي مثل حديقه صايره قبل جسر المشاة

.
.
.

هذا الشارع اللي امشي فيه دايم علشار اروح مكان الباص !

.
.
.

ذاك اليوم وانا راد البيت .. لقيت هذا الطير .. اللي ياكل من الورد .. وصغير حيييييل

وهذا الطير اسمه الطنان !

ما يحتاج اوضح اكثر !

الصوره تعبر عن نفسها !

سوالف العين الزرقا .. او الكف .. اللي بعض الناس يحطونه عن الحسد .. ما يجوز ..

والحين عرفت انها حركه يهوديه لان عندهم هذا شي من عقيدتهم !!

فـ ديروا بالكم ..

.
.
.

واتمنى تكون الصور عجبتكم ^_^

" اضغط على الصوره علشان تشوفها بشكل اكبر "

واسف مره ثانيه على التقصير ^_^

غبار فرقة التلفزيون !!

مقطع فيديو صورته بتاريخ 27/3

وانا طالع من التطبيقي ورايح طريج الغزالي .. الساعه ثلاث الا ربع !

الجو كان غباار .. والاغنيه اللي مشغلها حدها غبار !!

هههههههههههههههههههههههه

شوفو التصوير كله .. ^_~

ما اقول الا ..

الله يرحم ايامكم يا فرقة التلفزيون !

من الأرشيف !

السلام عليكم

اليوم جايبلكم مجموعه رسمات بسيطه .. راسمهم بالفوتوشوب

بس قبل لا اعرضلكم الرسومات

احب اوضح شي

ان كل الرسومات ..بالفوتوشوب 100%

بدون استخدام اي صور خارجيه أو فرش أو فلاتر

وراح احطلكم كل صورهوسالفتها .. علشان توضح الفكره عندكم

على فكره .. الاسم اللي على الصوره .. هذا النك القديم ^_^

وكل الرسومات كانت بسنة 2004 << الله يرحم ايام زمان :(

بسم الله نبدي ^_~

هذي اول رسمه لي بالفوتوشوب .. وهي بعنوان .. الماضي !

كانت تجربه اني ارسم شي من الماضي والتراث ^_^

--------------------------------------------------------------------------

" الساعه "

هذي الساعه .. وان الانسان يمر بحالات فرح وحزن خلال الساعات !!

<< من الصدفه ان شعار كاس العالم 2006 كان قريب من شكل الوجيه اللي حاطها p-:

------------------------------------------------------------------------------------------------------

"الحمامه"

هذي الرسمه عاجبتني حيل

وانا ارسمها اتخيل .. ان اللي بيصور هذي اللقطه .. باللحظه اللي بيصور فيها ..

وقفت حمامه جدامه .. ولما الحمامه شافت الفلاش .. انحرجت .. ههههههههههههههههههه

وطلعت صورة المصور بهذا الشكل

<< خيال واسع لوووووول

-----------------------------------------------------------------------------------------------------------------

عنوان هذي الرسمه " نهاية الادمان "

الادمان نهايته الندم ..وهذا شاب ادمن وتحسف

اكثر شي تعبني بهالرسمه .. الشعر .. العيون " راح تلاحظون فيها دموع " P-:

والصراحه اكثر شي عاجبني فيها .. رجله " احس انها لوحه زيتيه " هههههههههههه
.................................................. .................................................. ...

وراء كل مصيبه .. فرج !

كانت عباره عن تجربه لي برسم النور " لاني كنت اشوفه بغرفتي اذا طلعت الشمس ! " ^_^

<< وكنت احاول اني اسوي شعار خاص فيني .. بس ما ضبطت العمليه ههههههههههه

------------------------------------------------------------------------------------------------

من طلب العلا .. سهر الليالي

هذي من اجمل الرسمات اللي سويتها .. يعجبني الرسم بوضع الليل

وهذي الرسمه كانت متعبه جداً !!

وعجبت كل واحد شافها ! ^_~

لدرجة انها انباقت .. وصارت على غلاف شريط اسلامي بدون علمي :(

--------------------------------------------------------------------------------------

" وحش آلي "

كانت عندي رسمه نفس هذي .. حبيت اني اسوي مثلها ..

وكانت تجربه لي .. برسم المخلوقات الآليه !! P-:

-----------------------------------------------------------------

" البر "

كانت تجربه جديده لي .. والعمل بهذا الاستايل ..عباره عن طبقات ..

اشبهها بمسرحيات " الدمى المتحركه "<< ماني عارف شلون اشرحلكم الفكره .. لكنها واضحه P-:

-----------------------------------------------------------------------------------------------------------


" الخيمه "

من اكثر الرسمات اللي خذت وقت !

لاني كنت ارسمها بكل دقه .. كنت ارسم خيط خيط بالخيمه .. !

وكانت تجربه اني اضبط شكل الغيوم بالسما ^_^

واني ادمج فيها الابعاد اللي يستخدمونها المصورين !

-----------------------------------------------------------------------------------------------------------------

هذي تجربه لرسم عين وخشم !

<< ماعندي خبره بالمكياج .. وسويت جذي .. هههههههههه

--------------------------------------------------------------------------------------------------------------

" دير بالك "

لا تقرب من هالحديقه .. علشان ما يطلعلك " الكلب " اللي فيها ! P-:

كانت تجربه برسم العشب .. وسور الحديقه ! ^_^

------------------------------------------------------------------------------------------------------------------------

مسابقه عصف الدماغ !

كان بالمنتدى اللي اشارك فيه .. مساابقه .. انهم حاطين شكل .. وكل واحد يستخدمه بتصميم !

انا قلت ابستخدمه برسمه .. وكررت الشكل وصار اثنين متقابلين .. وبالاخير ..

صاروا شوارب هذا الصيني ههههههههههههههههههههههههههههههههههه

------------------------------------------------------------------------------------------------

" تحدي الخيال "

تذكرون الحمامه اللي قبل شوي .. ؟!

هذيه .. شفتها طايره بالسما بين الغسوم ... وقلت القطها برسمه .. هههههههههههه

هذي الرسمه كانت تجربه برسم الغيوم " المتلبده " << كثرلي منها يا واد يا انته P-:

---------------------------------------------------------------------------------------------------------------

" قوة التأثير "!!

كان اكو مسابقه مسوينها

حاطين كوره .. ومأشرين عليها بسهم

وكل واحد يستخدم خياله .. شنو بيصير اذا كان اكو ضغط على الكوره ؟!

اكو ناس رسمو انها تنفجر .. وانها تنعوج .. او تنفش !

لكن انا قلت بروح بعيد عن الموضوع

وبخلي الكره . جليديه .. وعامل الضغط هو حرارة الشمس !

وكانت الناتج .. هو ذوبان الكره الجليديه !!

<< شرايكم بالفكره ؟ P-:

وبالاخير

اتمنى انكم استمتعتم بالرسومات ^_^

واتمنى انها تكون عجبتكم

>> المفروض تضغطون على كل رسمه علشان تشوفونها بشكل اكبر !! <<

اذا ما ضبطت معاكم .. بلغوني !

اسد الجزيره

مرحبا يا اللي تقرون ^_~

الصرحه هالفتره خف دخولي للنت .. بسبب ادماني على المسلسل الكويتي :

أسد الجزيره

اللي تم منع عرضه !

لكن الحمدلله قدرت اوصل حق نسخه مهربه !

انا وصلت للحلقه التاسعه ! << الـ DVD الرابع

والمسلسل عندي على 8 DVD's .. يعني 30 حلقه !

انا إلى الان ما شفت سبب مقنع يبرر المنع !

القصه محايده .. واللي كاتبها "شريده المعوشرجي " !

العمل بشكل عام .. قوي وضخم !

وهو من بطولة : محمد المصور , حياة الفهد , عبدالرحمن العقل , حسين المنصور , عبدالامام عبدالله , عبدالمحسن النمر . خالد البريكي ... إلخ من الممثلين الكبار !

لي باك اذا خلصت منه ^_~

المركز العلمي

مرحبا لكل من يقرى اللي بكتبه ^_^

قبل فتره ..

وديت عيال اخوي المركز العلمي ..

طبعاً المكان عجيب ويفتح النفس .. يعني بين فتره وفتره .. احب اطلع عيال اخوي او عيال اختي ..

لاني احب القعده بالاكواريوم واجابل السمج !

وبحطلكم شوية صور من اللي صورتهم من تليفوني .. سوني اريكسون K850i ^_~

عيال اخوي ووراهم المنظر اللي محد يمل منه ^_^

.

.

هذي صوره من نفس المكان تقريبا !

.

.

هذي خنافس .. نوع من الحشرات اللي بالبر !

هذي الحيه يسمونها " داب ابو قرون " !

شوفوها شلون دافنه نفسها !

اذكر مره كنا طالعين مع مجموعه كبيره من العايله نروح نلقط فقع .. ايام ماكان اكو ربيع وبر مثل الناس ... قبل لا تصير المحميات !

بس سالفه قبل اكثر من 10 سنين !

كنت اتمشى .. وكنت اشوف شي مرسوم على الارض .. شكله دوائر !

قعدت اقول منو المزاج اللي قاعد يشخبط على الارض !

وبعدين لما ركزت عبالي انه حبل استغربت انه يطلع صوت .. كنت بحركه برجلي .. بس الله ستر وما ادري منو قام يصيح عندي قالي انحااااش حيه !!

اهو قال حيه ... وانا قلبي طاح ببطني من الروعه !

جان اعطيها خوش نقزه وصلت منها فوق غمارة الجمس !

<< وقت الخرعه تصير سوبرمان ههههههههههههههههههههههههههههههههههه

طلعت حيه ام جرس !

المهم اخوي اخذ الشوزن ام خمس .. وعطها خوش رميه خلى دمها يطشر ^_^

بس .. يا حب الحريم للحجي الزايد .. بالغوا بالسالفه لين ما قالوا ان الحيه لدغتني هههههههههههههههههههههه

المهم الله ستر علي ذاك اليوم ^_^

واسف على الاطاله .. بس الحيه ذكرتني بهالسافه P-:

فريز !

مرحبا ..

طبعاً صيف .. وحر !
والكل مقزرها نوم ونت وهياته بالليل !

بس انا اذا شبكت ما استغنى عن مشروبي " فريز " !

P-:

وهذي صور للثلاجه اللي بالغرفه وفيها فريز .. وعصير وحليب وكاكاويات .. !

<< شغل تقزيره ههههههههههههههههههههههههههههههههه

هذي اقرب ..

وطبعاً كل ما قلت الكميه .. اروح " مركز سلطان " ... أو .. " كارفور " ^_~

طبعاً عندهم ينباع بـ 190 ... وعند ستابركس دبل الدبلات !

<< يعني ما ادري جم .. جنه بـ دينار او شي جذي .. بس سعر مو بالعقل هههههههههههههههههههه

برشلونه !

! Barça


في البدايه احب اوضحلكم اني مشجع برشلوني إلى درجة الجنون

<< يعترف بخباله هههههههههههههههههههههههه

واحب اوريكم اخر شي شريته .. يخص برشلونه شريت اللبس الجديد لبرشلونه من فتره .. طلبته من النت تاريخ 16/7 ... والموقع نفسه شريت منه السنه اللي طافت ^_~

على فكره .. البس الجديد اللي شريته .. لي الحين ما نزل بالكويت !

<< عباله مسوي انجاز ! ههههههههههههههههههههههههه

لبس برشلونه الاساسي .. اللي ينقسم نصين .. أحمر و أزرق يعني مو على العاده .. انه يكون مخطط بهذي الألوان !

هذي الحركه يعني .. يمكن يكون نوع من التفائل .. لان هذي الحركه كانت تقريباً مشابهه لموسم 1998-1999 بأحتفالية مرور 100 عام على انشاء النادي !!

.

.

هذي من ورى .. على اسم لاعبي المفضل .. وحبيب قلبي " تشافي " .. لاني متفائل فيه .. اول شي .. انا رقمي المفضل .. 6 .. وهذا لاعبي المفضل .. ولما شريت تيسيرت برشلونه السنه اللي طافت .. قدم موسم يعتبر الافضل بتاريخه .. وانهاها بفوزه مع منتخب اسبانيا بلقب بطولة يورو 2008 .. وحصل فيها على جائزة افضل لاعب ^_^

.

.

هذا اللبس الثاني .. الاصفر .. اللون اللي يتفائل فيه برشلونه .. لان كان لبسه الثاني اللي ما خسر فيه ولا مره في موسم 2005-2006 .. يوم ياخذ لقبه الثاني بـ بطولة " أبطال اوروبا " .. وحرقة الخط الاحمر والازرق .. تمثل ألوان النادي .. وهذي الحركه سووها بالسبعينيات !

.

.

هذي من ورى .. على اسم ورقم اللاعب الارجنتيني الموهوب .. ميسي .. ويعتبر من افضل اللاعبين بالعالم .. حالياً .. وان شالله يكون دايهم اهو الافضل ^_^

بس اللي قهرني انه يمكن يغير رقمه وياخذ رقم 10 ... عقب ما طلع رونالدينيو من برشلونه وراح ميلان ><"

.

.

هذي صوره جماعيه هههههههههههههههههههههههههههههههههههههههه

.

.

صور منوعه !

نظره عامه لـ مجموعة اشيائي البرشلونيه ^_^

.
.

نظره اقرب P-:

ههههههههههههههههههههههههههههههههههههههههه

.

.

هذي صوره لسيارتي القديمه .. حق موسم 2006-2007

نظره اقرب ^_^

.

.

وهذي من موسم 2007-2008

وهذي نظره اقرب ^_~

.

.

هذي الميداليه اللي كانت موجوده فيها .. ولا تزال موجوده بسيارتي الجديده ^_^

.

.

والحين ..

عرفتوا شنو اقصد لما قلت اني احب برشلونه .. لحد الجنون ؟! .. P-:

هههههههههههههههههههههههههههههههههههههههههههههههههههههههههههههههههههههههههههه

اتمنى عجبتكم الصور .. ^_^